后海灣（Hau Hoi Wan）係香港同深圳東面一個大灣，因為近深圳，又叫做深圳灣（Shenzhen Bay或者Shum Chun Bay），而英國人叫佢做Deep Bay，所以又叫做深灣。后海灣原本寫做後海灣，因為佢係南頭後海，所以叫後海灣，而南頭嘅前海，亦都有前海灣（又叫大剷灣），向住伶仃洋。
后海灣三面畀地圍住，東係南頭半島，北係深圳，西係香港新界米埔、流浮山等地，西南方向通出伶仃洋，門口係深圳蛇口同香港嘅爛角嘴。
英國向大清租借新界時，亦將成個后海灣租埋，而岸界係以水漲計，所以當時香港西界係當時新安縣岸邊。西界再響南頭半島南端，赤灣附近接條直綫落大嶼山大澳，做香港西海界。不過1997年7月1號之後，后海灣正式由香港同深圳各佔一份。
響中華人民共和國成立之後，因為有大量難民來香港，所以香港同中國大陸之間來要受管制。而當時大陸生活環境唔係咁好，有連場政治運動，唔少人都坐船由后海灣偷渡來香港，響流浮山等地上岸。1967年香港左派爆動，有香港人響后海灣畀人擄返大陸。
后海灣因為周圍有河注入，所以有唔少淺灘，變成紅樹林。流浮山亦產蠔。不過深圳方面大陸填海，所以淺灘亦少咗好多。
后海灣有橋由香港鰲磡石通去南頭半島東角頭。
坐標: 22°30′N 113°58′E