周星馳（Stephen Chow，1962年6月22號—），綽號「星仔」、「星爺」，係香港一個電影演員同導演。由於佢嘅搞笑戲深入民心，所以有「喜劇之王」哩個美譽。

星途簡介
周星馳細細個就好崇拜李小龍，嗰時開始已經嚮往成為一個專業嘅演員，所以中學畢業之後就參加咗TVB藝員訓練班嘅考試，但俾人淘汰咗。落選後嘅周星馳四圍咁搵窿路，終於俾佢成功咁進入咗TVB藝員訓練班第11期嘅夜訓班。喺1982年畢業後，星仔俾人擺咗去做兒童節目《430穿梭機》，同當時嘅幾個藝人張國強、譚玉瑛、曾華倩同龍炳基等一齊擔任主持工作，同埋最多只係喺幾部電視連續劇做下臨記。不過睇返喺《430穿梭機》入面有個環節叫做《黑白疆屍》，其實嗰時星仔所扮演嘅白疆屍已經開始俾人認識佢嘅喜劇嘅天份。直到1986年周星馳先至有機會參演一套單元劇《哥哥的女友》，跟住慢慢再有機會喺其它劇集做吓配角，好似《生命之旅》、《鬥氣一族》、《阿德也瘋狂》、《大都會》等。
1989年，周星馳終於有機會主演《蓋世豪俠》，喺劇入面初顯無厘頭風格；佢喺劇中經常講嘅「坐低飲啖茶，食個包」成為咗當時嘅流行口頭禪。同年喺另一套電視劇《他來自江湖》入面，星仔更大展功力，演譯喜劇角色「何鑫淼」（讀「何音秒」；劇入面啲人叫佢做「金水」），成為香港連續劇嘅一個經典人物。哩一刻星嘅無厘頭演技開始受人注意。哩套劇入面，星仔同吳孟達（人稱「達哥」或「達叔」）嘅父子組合極之搞笑，兩人嘅合作亦因為哩套劇而開始大受觀眾歡迎，奠定咗日後合作無間嘅拍檔關係；甚至到後來星仔拍電影紅咗之後，哩對熒幕父子更加喺鏡頭外上演一場別開生面嘅上契，就係做後輩嘅星仔反過嚟做契爺，而做前輩嘅達叔反而係契仔，成為咗當時娛樂圈嘅一時佳話。
睇返當時周星馳喺電視界嘅日子，其實始終都冇真正受到重用，所以周星馳亦開始轉投當時大為興旺嘅電影界；1988年周星馳喺恩師李修賢嘅提攜下演出電影《霹靂先鋒》，仲因為哩套片而勇奪咗第25屆金馬獎嘅最佳男配角。1990年導演劉鎮偉趁著周潤發主演嘅《賭神》風潮，請咗星仔同達叔搭檔演出《賭聖》一片，套戲只係食返賭片嗰條水加埋喜劇路線，開頭以為觀眾反應只會一般，但係估唔到最後個票房竟然高達41,326,156港元，大破咗當時嘅香港票房紀錄。之後由星仔主演或者有份參演嘅《逃學威龍》、《家有囍事》、《審死官》仲屢破票房紀錄。喺1992年，周星馳主演嘅幾部電影囊括咗香港票房排行榜嘅前5名，真係夠哂風光。因為咁，周星馳同埋周潤發、成龍三個當時得令嘅電影藝人俾人合稱做「雙周一成」。
九十年代中期，由於港產片嘅產量慢慢減少，周星馳電影嘅產量亦都受到影響，不過亦都標誌咗星爺參與編導工作嘅開始。早喺1994年嘅《國產凌凌漆》，周星馳就初次有份以導演嘅名義出師；其後嘅《大內密探零零發》、《食神》、《喜劇之王》幾套戲，周星馳都有參與幕後編導嘅工作。1993年到1995年係星爺嘅全盛時期，不過到咗95年嘅《百變星君》、《回魂夜》就開始有走下坡嘅趨勢。直到2001年，周星馳首次全權執導嘅《少林足球》一出，喺香港嘅票房就已經高達60,739,847港元，又再次打破咗香港華語片紀錄。星爺仲憑著哩部片獲得咗第21屆香港電影金像獎最佳男主角、最佳導演、最佳影片等幾個大獎。到2004年，周星馳身兼監製、導演、編劇同埋主演嘅《功夫》，再爆香港票房紀錄61,278,697港元，打破埋《少林足球》所創下嘅香港華語片票房紀錄。而周星馳因為哩部片而奪得咗第42屆金馬獎最佳導演、最佳劇情片等嘅殊榮，仲入圍第63屆電影金球獎嘅最佳外語片，真係可以講得上叫好又叫座。
註：《少林足球》導演其實仲有李力持先生，後嚟佢哋兩個因為唔啱啞而從此一拍兩散。
2006年七月，星爺喺中國嘅寧波開拍佢嘅新戲《A Hope》，概念取自中國大陸嘅神州六號太空任務。有傳聞話今次呢部戲既總投資額達到一千三百萬美元。故事講述星爺飾演一個太空人，喺一次意外入面降落咗喺一個外星度，仲同嗰度啲外星人做咗好朋友。呢部戲暫定喺2007年中上畫。外國雜誌Variety Magazine喺2006年8月嘅報道話，呢套戲叫做《A Hope》。

演藝生涯
由於周星馳己經做咗好多年喜劇，所以好多香港人都會覺得「周星馳」等於「喜劇」。佢拍嘅戲除左好多人買飛入場睇之外，仲有學界專門研究佢嘅電影，仲將周星馳定性為藝術家。吳鎮宇都好感慨咁話：「我睇咗《功夫》，如果呢部戲唔係周星馳做嘅，大家根本唔會去睇。」
佢嘅笑片好多人睇，係咁破票房紀錄，唔少香港人平時同人傾計嗰時，都不自覺用周星馳嘅對白，例如「你講嘢呀？」就出自周星馳嘅電影，意思係「你係咪喺度吹水？」同時，周星馳嘅電影亦都令到喜劇成為繼動作片後香港嘅電影主流，後期片商開嘅戲，亦都多咗笑片。
周星馳非常尊敬李小龍，所以佢嘅戲有唔少嘅鏡頭都係特別向李小龍致敬，例如安排某啲角色着上李小龍式嘅衣服，或扮佢嘅武打動作。咁樣做，喺某程度上亦都係喺度推廣緊「李小龍文化」。
另外，由於佢喺咁多部戲入面都係以小人物由低做起，再加上佢自己低微嘅出身，所以唔少人都會當周星馳喺香港草根階層由低做起嘅表表者，亦有人將周星馳睇成香港精神嘅象徵。 喺日本，除咗成龍、李小龍之類好受歡迎之外，自少林足球後，周星馳嘅戲亦有好大嘅影響。喺嗰度甚至有位名作家將自己嘅筆名改做「馳星周」，以表示自己係周星馳嘅忠實fan。

演出作品

1992年：群星會
1990年：孖仔孖心肝
1989年：蓋世豪俠、他來自江湖
1988年：大都會、夢邊緣、鬥氣一族、阿德也瘋狂、刑警本色、無冕急先鋒
1987年：生命之旅、陰陽界
1986年：城市故事、哥哥的女友
1983年：十三妹、射鵰英雄傳之鐵血丹心、再見十九歲、老洞、北斗雙雄、黑白殭屍
1982年：天龍八部、活力十一、蘇乞兒、香城浪子、獵鷹 電視劇(無綫電視)
周星馳主演或者參與過嘅電影約有54部。

2004年：功夫
2001年：少林足球
1999年：喜劇之王、玻璃樽（客串）、千王之王2000
1998年：行運一條龍
1997年：97家有囍事、算死草
1996年：大內密探零零發、食神
1995年：西遊記第一百零一回之月光寶盒、西遊記大結局之仙履奇緣、回魂夜、百變星君
1994年：破壞之王、九品芝麻官、國產凌凌漆
1993年：逃學威龍3之龍過雞年、唐伯虎點秋香、濟公
1992年：漫畫威龍、家有囍事、逃學威龍2、審死官、鹿鼎記、鹿鼎記2之神龍教、武狀元蘇乞兒
1991年：整蠱專家、龍的傳人、賭霸、新精武門1991、逃學威龍、賭俠2之上海灘賭聖、情聖、豪門夜宴（客串）、非洲和尚（旁白）
1990年：望夫成龍、一本漫畫闖天涯、龍鳳茶樓、風雨同路、咖喱辣椒、小偷阿星、師兄撞鬼、賭聖、無敵幸運星、江湖最後一個大佬、賭俠
1989年：龍在天涯、義膽群英、流氓差婆
1988年：霹靂先鋒、捕風漢子、最佳女婿 電影

2005年：台灣金馬獎：最佳導演《功夫》
2002年：香港電影金像獎：最佳導演、最佳男主角、傑出青年導演《少林足球》
2002年：香港金紫荊獎：最佳導演《少林足球》
1997年：香港金紫荊獎：最佳男主角《西遊記大結局之仙履奇緣》
1992年：亞太影展：最佳男主角《審死官》
1989年：台灣金馬獎：最佳男配角《霹靂先鋒》 攞過嘅獎
90年代初周星馳參與嘅電視劇同電影，對白入面成日用到「小丙」(廣東話入面係「打得少」嘅意思)、「飲啖茶食個包」及「小強」，其實都取自1980年代香港暢銷漫畫《玉郎漫畫》中甘小文作品嘅對白；而《功夫》入面嘅哨牙珍同埋《行運一條龍》中嘅肥婆四，亦係甘小文畫筆下嘅角色名字。

經典對白
註：「斧頭幫」最早出現喺王晶作品《賭俠2之上海灘賭聖》中，幫會入面嘅人同樣着黑色西裝，笠高帽，手揸斧頭做武器，故事背景同樣係民初嘅上海。

斧頭幫
一支穿雲箭，千軍萬馬來相見！
細路，睇你骨格精奇，實在係百年難得一見嘅練武奇才… 《功夫》
註：因為好多套星爺嘅戲都有搵佢老友李健仁扮女人做「如花」，所以依家哩個名已經普遍成為咗醜樣嘅代名詞，仲要通常係指女性。
哩段係包龍星練成鬥鬧交絕技之後，同龜婆鬥鬧嘅對白其中之一二。

如花
甲：因住收尾嗰兩年！　乙：嗰兩年幫你執骨！／甲：抵你生仔冇屎忽！　乙：冇屎忽個仔係同你生嘅！ 《九品芝麻官》
唐伯虎做書僮華安之前嘅僕人編號。
註：小李老母喺廣東話入面係粗口嘅諧音。
註：呢段其實係一首歌嚟。
註：小強喺戲入面係一隻曱甴，咁平時用就可以用嚟叫好多嘢，包括生嘅嘢或者死嘅嘢，唔限於曱甴。
哩段係劇中唐伯虎以敲擊樂嚟表演嘅數白欖內容。

9527
小李飛刀個老母，哦，原來係小李老母飛刀。
燒雞翼，我鐘意食，但係你老母講你就快釘，越係快釘之所以越要整多隻，如果而家唔食以後無機會再食。你真係就快釘？我真係就快釘！如果而家唔食以後無機會再食。
小強！小強你點呀小強？小強你唔可以死架小強！我同你相依為命、同甘共苦咗咁多年，一直當你係親生骨肉一樣供書教學，估唔到今日白頭人送黑頭人
稟夫人，小人本住在蘇州嘅城邊，家中有屋又有田，生活樂無邊，點知個唐伯虎，佢橫蠻不憸點，勾結官府目無天，巧取豪奪我家田，我阿爺同佢翻面，慘被佢一棍來打扁，我阿嫲鬧佢欺善，更被佢捉了去唐府，強姦了一百遍，一百遍！最後仲懸樑自盡慘無邊，佢還將我父子，逐出了家園，流浪到江邊，我為求養老父，袛有獨自行乞在廟前，點知個唐伯虎，佢實在太陰險，知道此情形，竟派人來暗算，把我父子狂毆在市前！小兒身壯健，殘命得留存，可憐老父魂歸天，此恨更難言，為求葬老父，唯有賣身為奴更作賤，我一面勤賺錢，一面讀書篇，發誓把功名盡顯，手刃仇人意志堅，從此【唐寅詩集】伴身邊，我銘記此仇不共戴天！ 《唐伯虎點秋香》
(歌嚟嘅)

你老豆有身紀紀紀紀，恭喜恭喜 《一本漫畫闖天涯》

巴黎鐵塔反轉再反轉
無定向喪心病狂間歇性全身機能失調症，簡稱腦震盪
家明表哥，婉君表妹
醉拳甘迺迪, 即係南拳北腿孫中山o既下集
媾女就好似食煎雙蛋咁，呢嗱跳緊繩呀（將隻碟上下郁郁吓）！媾完（用手指撩勻兩隻蛋黃），就要食（用咀啜），食得（黏喺鼻尖嘅蛋黃汁都舐埋），唔好嘥！
人生有個真正朋友的確好極，飲勝！
阿諾「豬」~~(拉長)~~華生力「啤」
邊個淫蕩呀？我淫蕩！邊個淫蕩呀？你淫蕩！
家陣老笠，除條底褲出嚟。
Pretty woman 搵老襯 《家有囍事》
註：哩段係香港女歌手徐小鳳當年名曲《變色感情》嘅歌詞，最尾改篇咗少少。

各位觀眾，五條煙！
你睇我唔到！你睇我唔到！你硬係睇我唔到！
昨日，我菲律賓工人行過街市，聽到有個賣魚佬講話有條友仔叫做賭神，係你。哈哈……我當堂嚇咗一跳，然後得啖笑。呢個世界，居然有人自稱為賭神，咁即係分明當我流唧！嗱！我就叫賭聖，你賭啤都要帶隱形液晶體眼鏡啦，我睬你都嘥氣，直情睇穿牌嘅，呢啲就叫特異功能。呢度有隻煙士，只要我輕輕一捽，就即刻變為一隻皺咗嘅煙士，因為我未發功呀嘛，發左功變副麻雀出嚟都得。你話我果然無厘頭，我夠話你訓醒戇九九咯。望咩呀﹖條氣唔順呀﹖發個輪嚟大家研究下。當然，你要補番一百幾廿萬過我就唔在講架啦。啤咩呀﹖學嘢唔使錢呀﹖抄底我聯絡電話係香港︰3345678，我再重覆一次係香港︰3345678。你唔搵我我無所謂，因為呢啲係你嘅損失。十點鐘後唔好打嚟，因為我瞓咗！
逝去感情如何留得住，半點痴情遺忘殊不易，更多悽悽慘慘的遭遇，我不知道，冚家剷！
刀仔鋸大樹。 《賭俠》
註：要用唔咸唔淡嘅普通話讀出嚟。
醬爆喺跳舞前嘅一句爆發性說話。適用於任何將要「爆」嘅情況，例如：發脾氣、起跑、去廁所……等。

地球是很危險的，你回去火星吧！
開心嘅時間過得特別快，又係時候講拜拜。
喺哩個 Moment，我要爆啦！ 《少林足球》
註：呢句對白其實係王家衛電影《重慶森林》中，以菠蘿(鳳梨)罐頭比喻愛情嘅對白改篇而成。平時應用，可以將愛情同埋女仔換咗做第二啲嘢，例如：「曾經，有一條好平嘅記憶體擺喺我面前，但我冇豪氣咁去購買，等到個價升返嘅時候先至追悔莫及，人世間最痛苦嘅事情莫過於此。如果上天能夠俾我一個重新嚟過嘅機會，我會同嗰個sales講三個字：『我要買』。如果係都要喺呢單交易加上一個數量，我希望係，一萬條。」

「曾經，有一份好真誠嘅愛情擺喺我面前，但我無好好咁去珍惜，等到失去嘅時候先至追悔莫及，人世間最痛苦嘅事情莫過於此。如果上天能夠俾我一個重新嚟過嘅機會，我會同嗰個女仔講三個字：『我愛你』。如果係都要喺呢份愛加上一個期限，我希望係，一萬年。」
做咩呀﹖你愛呀﹖你愛要出聲先得架，你愛我比你，你唔愛我當然唔會比你啦！無理由你話愛我唔比你，你唔愛我比你架嘛！大家講道理丫嘛！拿，我數三聲，你話愛唔愛喇喎。 《西遊記》系列

鹼水麵無過冷河，所以成碗湯有鹼水味。魚蛋亦都冇魚味，但係你為咗掩飾，專登加啲咖喱汁將佢做成咖哩魚蛋，但係咁做太天真，因為你煮嘅時間唔夠，咖喱味根本只係喺表面，而冇入到裡面，掂到湯之後重要沖走埋。好好哋一粒咖喱魚蛋，俾你整到無魚味亦都無咖喱味，失敗！蘿蔔無揀過，太多渣，失敗！啲豬皮又煮得太淋，無咬口，失敗！啲豬紅鬆泡泡，一夾就散，失敗中嘅失敗！最慘係啲大腸，入面都重未通乾淨，重有舊屎，你有無攪錯呀﹖(跟住莫文蔚俾卷紙巾佢，話：攞去抿乾淨佢囉。)
佢高傲，但係宅心人厚﹔佢低調，但係受萬人景仰﹔佢可以將神賜俾人類嘅火運用得出神入化，做出堪稱火之藝術嘅菜式！究竟佢係神嘅化身，定抑或魔鬼嘅使者﹖無人知，但係有一樣嘢可以肯定嘅，每個人都會俾一個稱號佢 --- 食神！
俾你估到我仲叫食神？！
少林寺十八銅人！(少林寺十八銅人每逢擺陣時大叫。注意嗰陣係只有頭三個人耍功夫，後面有啲做緊金雞獨立，有啲拎摺凳猛車周星馳) 《整蠱專家》
註：所謂超級武器霸王，其實只係將以上嘅十大武器用禾桿草縛埋一齊。
好靚表姐同凌凌漆講，啲音唔準係因為佢係北姑。

古有關雲長全神貫注捉象棋刮骨療毒，今有我零零漆聚精會神睇鹹帶鋤骨攞彈頭。
哩支叫古惑的槍，佢會一次向前射一次向後射梅花間竹咁嚟架。
嗱！好似呢個ModelF40咁，表面上，佢係一個手提電話">大哥大電話，實際上，佢係一個鬚刨，方便我出席一啲宴會埸合，能夠神不知鬼不覺咁剃鬚…呢個鬚刨Model911，表面上，係一個鬚刨，實際上，佢係一個風筒…(再指住第二個風筒) 而呢個風筒只係表面的掩飾，事實上，佢亦係一個鬚刨，問你死未﹖
呢支唔係普通嘅電筒，呢支係唔使電芯嘅太陽能電筒！喺有光源嘅時候佢會著，冇燈佢就絕對唔會著。如果想佢著，只要囉個電筒出黎照住佢…咁佢就會著啦！
我費一生嘅精力，集合十種殺人武器於一身嘅︰超級武器霸王！！產品編號︰「攞你命３０００」，經已研究成功咗啦！西瓜刀、單車鏈、火藥、硫酸、毒藥、手槍、手榴彈、三角銼……每樣都係獨當一面，家下集合埋一齊，問你死未？
唉，你咁樣「座」(做)係無用架，好似你呢啲咁「猝」(出)色嘅「難」(男)人，無論暱埋喺邊，都好似漆黑之中嘅螢火蟲一樣，咁鮮明，咁「猝」(出)眾。你唏噓嘅鬚根, 憂鬱嘅眼神，神乎奇技嘅刀法，同埋嗰杯 Dry Martini……都已經將你深深咁「猝」(出)賣咗。雖然你係咁「猝」(出)色，但係行有行規，無論點，你都要找埋琴晚條過夜數,叫雞唔洗俾錢呀!﹖
漆：咁多年啦，我以為國家已經將我忘記咗。　長官：點會呢，就算係一條底褲一張廁紙都有佢嘅作用。　漆：呢個比喻真係一流。